Құрметті олимпиада қатысушылары!

Сіздердің назарларыңызға қазақ тілі пәні бойынша олимпиадалық тапсырмалар ұсынылады. Қазақстанда қазақ тілі – көптілді тұлғаның коммуникативтік компетенциясын құрайтын міндетті пәндердің бірі.
Біздің елімізде қазақ тілі мемлекеттік тіл мәртебесіне ие болды, сондықтан әр қазақстандықтың парызы – мемлекеттік тілді жетік деңгейде меңгеру. Осы мақсатты жүзеге асыру үшін қазақ тілі білім берудің барлық сатталарында балабақшадан бастап жоғары білім беру мекемелеріне дейін оқытылады. «Қазақ тілі – барлық қазақстандықтарды біріктіретін бас факторын дамыту үшін біз күш салуға тиістіміз» - дейді президентіміз Н.Ә.Назарбаев.
Қазақ тілін меңгеру қазақстандық отаншылдықты қалыптастырудың негізі болып табылады, сондықтан оған оқушылар жағынан көп назар аударылады. Көп тілдерді білу кең көзқарас, өткір ақыл, қоғамның даму заңдары мен үрдісін ұғуды қалыптастырады, тілдік фактілерді салыстыру арқылы ұқсастықтарды табу, болжам жасауға жол ашады.
Қазақ тілінде «ана тілі» – «туған, ананың ақ сүтімен дарыған» деген мағынаны білдіреді. «Ана тілі - жүректің терең сырларын, басынан кешкен дәуірлерін, қысқасы, жанның барлық толқындарын ұрпақтан-ұрпаққа жеткізіп сақтап отыратын қазына. Сондықтан да біздің ана тіліміз халық болып қалыптасқаннан бері жасап келе жатқан жан дүниеміздің айнасы, өсіп өніп, түрлене беретін мәңгі құрымайтын бәйтерек болып қалмақ...» - деген атақты жазушы Ж.Аймауытов.
Халқымыздың қазіргі мәдени-рухани жағдайын, ана тілімізді, салт-дәстүрімізді байытуға байланысты баспасөз бетінде неше түрлі көкейтесті, көкейкесті мәселелер көтеріліп жатыр. Сондай мәселелердің бірі - халқымыздың мәдени өмірінің тұтқасы болып келе жатқан, мол мұрасы, ел байлығы – қазақ тілін байыта, толықтыра білу, көркейте түсу. Данышпан Б.Момышұлы тілімізді осылай сипаттайды: «Қазақ тілі - өзінің өткірлігімен бой балқытып, тамыр шымырлатып, жан жүйенді жандырып, құлақ құрышын қандырып, ұғымына қонымды, жүрегіне тиімді, қысылтаяң қатал жағдайға қайрап, егеп, «сөз тапқанға қолқа жоқ» дегендейін ерге, елге медет болып, адам түгіл жағдайдың көмейіне құм құйып, аузын аштырмай, үнін шығармай қоятын ең әсерлі, ең әдемі шешен тіл».
Қазақстанда қазақ тілін әйгілеу және қолдану саласын кеңейту, теориялық білімдер мен тәжірибелік дағдыларды тереңдету мақсатында дистанциондық пәндік олимпиадаға қатысуға шақырамыз.