ҚИО порталын ұйымдастырушыларға үлкен ырзашылығымды білдіргім келеді. Бұл үлкен де пайдалы іс.
Олимпиадаларға қашықтан қатысу деген оқушыларға да, енді мұғалімдерге де өте үлкен мүмкіндіктер береді. Сабылып, ана жерге, мына жерге барып, ортадағы адамдарға тәуелді болып шаршамайсың, артық-ауыс қаражат та жұмсамайсың, өз үйіңде-ақ отырып, қатыса бересің. Бұл, түсінген адамға, ғажап мүмкіндіктер. Ал мұғалімнің өз мамандығы бойынша құзыреттілігін көтеру мақсатында ҚИО ең бірінші құрал болуы керек екеніне шүбәм жоқ. Міне, сондықтан да ҚИО порталында мұғалімдер олимпиадалары өткізіле бастағанын білгенде менен қатты қуанған информатика мұғалімі болған жоқ шығар.
Информатиктің қуанатынындай бар. ҚИО арқылы оқушылар да, мұғалімдер де, тіпті қалаған адам интернет мүмкіндіктерін пайдалануды үйренеді, интернеттің ақпараттық кеңістігіне кіріп, оның орасан зор оқу-білімдік мүмкіндіктерін тиімді пайдалануды үйренеді. Мен сияқты 70-ші жылдардан компьютерді үйретіп келе жатқан ұстаздың арманының өзі осы емес пе. Халықтың ақпараттық-коммуникативтік құзыреттілігі жоғары болуын, әрбір азаматтың заманауи ақпарат кеңістігінде балықтай жүзуін мен болмасам кім армандайды?!
Алғашқы информатика мұғалімдерінің республикалық онлайн олимпиадасына қуана-қуана тіркелдім, интернеттегі майлру, фейсбук, твиттер сияқты әлеуметтік желілер арқылы барлық информатиктерді де қатысуға шақырдым. Жаңалық десе жаным ұшып тұратын адаммын, жастарды "сендерден озып кетем" деп қайрадым. Қолымнан келгенінше барынша көп информатиктерді ҚИО-на тартуға атсалыстым.
Ал енді олимпиада қалай өтті? Ең алдымен айтарлық нәрсе - оны онлайн тапсыру өте ыңғайлы, жинақы жасалған. Қолданушының интерфейсі өте қолайлы, бәрі өте түсінікті. Сұрақтардың іріктелуіне де, сапасына да ешбір "әттеген-ай" қазірше жоқ. ҚИО порталымен онлайн байланыс бір рет те үзілген жоқ, мен осыған таңқалдым. Портал дәл олимпиада кезінде қандай сыртқы трафикпен істегенін шамалаймын. Яғни ҚИО қызметкерлерінің олимипиадаларды сапалы өткізуге қаншалықты техникалық дайындық жасағанын осының өзі-ақ көрсетіп тұр.
Менімен қатар қасымдағы информатик келіншек олимпиадаға кіретін логинін ұмытып, бір қорықты. Мен жылдам порталдың логин мен парольді еске салу қызметіне хабарлама жолдадым. Заматта жауап келіп, серігім де ешбір кедергісіз олимпиаданы уақытында бастады. Портал қызметкерлеріне шын жүректен ырзашылығымызды білдіреміз.
Жалпы, бұл өте пайдалы да қызықты бастама екеніне еш дау жоқ. Сондықтан ҚИО қия берсін, алға дами берсін деп тілек білдірейік. Мұғалімдер олимпиадалары жиі-жиі өтіп тұрсын. Біз ұйымдастырушыларды қолдай жүріп, игілігімізге жаратайық.
Жеке басым, информатикамен қатар физика және математика олимпиадаларына да қатысамын деген шын ниетім бар. Тұрақты түрде, өмір бойы қатысамын.
